EVÎNA MÊRXASEKÎ

Îbrahîm Osman, bi derengî be jî, piştî berhevkirina gelek lêkolîn û ezmûnan, li ser hev pênc roman nivîsandine ku Weşanên Lîsê romana wî ya pêşîn a bi navê Evîna Mêrxasekî vê pêlê bi awayekî xweşik çap kir. Romana bi navê Evîna Mêrxasekî ne romanek e mirov karibe wekî deqeke ezmûngerayî bihesibîne, lê ji ber ku li ser babeteke ku ji me tevan ve nas e, bi Kurdîyeke ku dê firêqetîyê bide xwendevanên Kurd û piştî lêkolînine li ser wêje û dîroka me ya devkî ya sê sed salên dawî hatî kirin hatiye nivîsandin, bi raya me, em bi her awayî dikarin vê berhemê bi hêsanî li silsileya romanên Kurdî yên bedew zêde bikin. Babeta romanê evîna Dewrêşê Evdî yê Êzdî û Edûla Misilman e ku romannûsê me, wekî gotina Mem û Zîna Xanîyê gewre, fesane kiriye behane û qala pêwendîyên şer û aştîyê, evîn û nefretê, talan û bac û qemçûrê, destbirakî û dijminîya eşîrên Kurd, Ereb, Turkmen û dewleta Osmanîyan kiriye.

Îbrahîm Osman, ji bo nivisîna Evîna Mêrxasekî li bingehên dîrokî, kilaman, erdnîgarîyê, kesayetî û bûyeran kolaye û ev romana ku bi zimanekî epîk, bi Kurdiyeke dewlemend û bi tevneke ku li ser xwendevanan hukim bike hatiye vehûnandin nivîsîye.