ÊZDIYATÎ

Bi neteweya xwe ve Êzdî kî ne? Dînê wan ê Êzdiyatiyê, ku bi sedan salan e gelek ferman lê rakirine û Êzdî ji gelek deverên bav û kalên xwe bi tomerî ji navê hatine birin, yên mayî jî li cîhanê, li gelek welatan belav bûne, dînekî çawa ye? Di nava gêjgerînka dîroka reşebayiyê de, dîsa jî çawa çêbûye, ku Êzdiyan dînê xwe, zimanê xwe û digel gelek guherîn û veguherînan, pergala xwe ya civakî parastine?

Nivîskar Tosinê Reşîd bi vê berhema xwe ya hêja ve bi destê xwendevanên Kurd ên ku li kokên xwe, kelepûra xwe digerin digire, wan di nava gêjgerînka dîn, mîtolojî, civak, wêje, dîrok û gelek dînamîkên din re digihîne encama ku Êzdî bi neteweya xwe ve Kurd in, zimanê wan Kurdî ye, welatê wan jî, Kurdistan e.

Êzdiyatî, Oleke Hê Jî Nenaskirî, berhemeke gelekî hêja ye, ku bi birrek referansên biyanî û Kurdî hatiye nivîsandin û wê peyamê dide, ku pêwîst e Kurd bi xwe dest bavêjine lêkolîn û lêgerînên li ser nasnava xwe, welatê xwe, dîroka xwe û dînên xwe. Ev berhem ji vî awirî ve hêja ye.