QIRME

Tîtal delalîyê mala Şebabê Emir bû, li gundekî Kurdên Êzdî yê giran li nawçeyeke di navbera çiyayan de li Ermenistanê; birayê çend xûşk û birayan ê herî biçûk bû. Xwendina herî bilind di wê malbatê de ewî bi dest anîbû: Sinifa dehan yanê dibistana navîn temam kiribû. Eva di wî zemanî de nemaze li gundekî Kurdan destkeftineke mezin bû. Û ji ber vê xwendinê, lê nemaze zîrektî, êginî û aktîvîya wî, ew di gund de hilbijartibûn weke sêkrêterê organîzasîyona komsomolan ku ya herî mezin bû di nawçeya wan de: Zêdeyî sêsed komsomol di bin emrê wî de bûn. Û ji ber ku ew sêkrêterê organîzasîyoneke mezin bû, jê re meaşek jî girêdabûn û bi ser de jî ew hilbijartibûn weke endamê bûroya Komîta partîyayê ya nawçeyê. Ew li tenişta serok û berpirsîyarên nawçeyê rûdinişt dema civînên bûroyê ku pirsên jîyana nawçeyê yên pêwîst, girîng hel dikirin.