DÎWANA FEQÎYE TEYRAN

Dîwana helbestkarê Kurd ê klasîk, feqîyê dilan, Feqîyê Teyran, a ku ev ji zû ve bû gelek kesanan çaverê dikir, li dû lêkolîn û amadekirina tijî zorî û zehmetî ya Seîd Dêreşî, bi tîpguhêzîya ji tîpên Erebî bo tîpên Latînî ya Dewlet Elî û bi edîtorîya Kawa Nemir, ji alîyê Weşanxaneya Lîsê ve hat çapkirin. Gava ku meriv bi hûrgilî li vê xebata Seîd Dêreşî  binihêre, meriv dikare pir bi hêsanî bibêje ku dê di vî warî de valahîyeke gelekî mezin dagire, çewtî û talana li ser berhema Feqîyê Teyran ji navê bibe, rastîyê dabîn bike û ji bo niha niqteya dawî dayne ser vê babeta ku gelek lêkolîner bê belge û sened bi vir de bi wê de birine û anîne.

Nivîskar û lêkolîner Seîd Dêreşî, di lêkolîna  xwe ya li ser Feqîyê Teyran a bêtirî deh salan re, ji bo ku dîwana Feqîyê Teyran a kok û kamil bide hev, xwe gihandiye bêtirî heştê destnivîsên ku di nava bi sedan salan re ji ber hev hatine girtin û li welêt û li welatên dereke belav bûne, ji bo ku deqên yekgirtî yên berhemên Feqîyê Teyran pêk bîne, xebateke bê hevta dilsozane kiriye û êdî piştî vê berhemê, dê xwendevanên Kurd û lêkolîner, nivîskar û dîroknasên wêjeyê yên Kurd bişên encamine zelaltir, watene fesîhtir ji sercema berhema Feqîyê Teyran derxin. Dîwana Feqîyê Teyran a ku tevî pêşgotineke berfireh a li ser jînenîgarîya Feqîyê Teyran, nav û bernavên wî yên ku bi rêya destnivîsan hatine, li ser zar û zimanan mane, deqên helbestên wî, 2409 têbînîyan, serhatîyên der heqê Feqîyê Teyran de, ferhengeke dorfireh, sûretên gelek destnivîsên peyda bûyî, lîsta jêderan û war û navdaran, sercem 608 rûpel e.